SA vrugte-uitvoervooruitsigte na Verre Ooste rooskleurig

Suid-Afrikaanse appels en pere het reeds ’n stewige vasstrapplek in China en as alles reg loop, sal Chinese verbruikers binnekort ook aan Suid-Afrikaans steenvrugte kan smul.

Oor die afgelope vyf jaar het China se appelinvoere opwaarts gewissel van 7,5748 miljoen ton in 2020 tot 9,7515 miljoen ton in 2024. Sedert die eerste houer Suid-Afrikaanse appels in China in Januarie 2015 aangekom het, het Suid-Afrika die tweede grootste bron van ingevoerde appels vir China geword.

Jacques du Preez, bestuurder van markte en handel, het in Maart tydens ’n aanlyn seminaar Suid-Afrika se produksie- en uitvoersituasie na China, asook vooruitsigte vir die bedryf met rolspelers bespreek. Hortgro is vol hoop dat die Chinese mark ook vir Suid-Afrikaanse steenvrugte sal oopgaan wat produsente in staat sal stel om vrugte gedurende die Chinese winter- en lenteseisoen aan die mark te voorsien.

Hoewel  Suid-Afrika se appelproduksie klein is in vergelyking met China se massiewe uitset, bly Suid-Afrika die grootste appelprodusent in die Suidelike Halfrond. Suid-Afrika produseer elke jaar tot 2,158 miljoen ton appels, pere en steenvrugte, met ‘n sterk fokus op uitvoermarkte.

Suid-Afrika se appel- en peer-aanplantings is sowat 38 000 hektaar, terwyl steenvrugte sowat 16 000 hektaar beslaan. Met jare se ondervinding in die uitvoer na die Europese mark, het Suid-Afrika ‘n gesoute voorsieningsketting en gekonsentreerde plantpraktyke ontwikkel, met 88% van plantareas geleë in die Wes-Kaap.

Danksy wêreldklas beheerde atmosfeerbergingsfasiliteite kan Suid-Afrika vir 12 maande per jaar appels aaneenlopend verskaf, met piekuitvoerperiodes gekonsentreer tussen Januarie en Mei, wat die aanbodgaping vir plaaslike Chinese appels perfek vul.

Oor die afgelope vyf jaar het Suid-Afrika se appelplantarea relatief stabiel gebly, met ’n fokus op variëteitopgraderings vir ouer boorde. Verskeie nuwe variëteite, wat aantreklik vir Verre Oosterse markte soos China is, vaar goed. Die oppervlakte beplant met Fuji-appels het byvoorbeeld met 20% toegeneem, rooi-blosappels soos Royal Gala-appels met 29%, JOYA® met 258%, Flash Gala met byna 1 200 hektaar, en pienk-blosappels soos Pink Lady® met 53%, terwyl die aanplantings van groen appels aansienlik afgeneem het.

Suid-Afrika het in 2024 altesaam 3075 ton pere na China uitgevoer, waarvan 53% Forelle-pere was, gevolg deur Celina (23%) en Cheeky (21%). Suid-Afrikaanse pere word die hele jaar uitgevoer, met spitstye van Januarie tot Maart.

Volgens Du Preez het ’n afvaardiging van GACC verlede jaar inspeksies van Suid-Afrikaanse steenvrugteboorde en verpakkingsfasiliteite voltooi, wat hopenlik die weg baan om appelkose, nektariens, perskes, pruime en vars pruimedante (Europese en Japannese pruime) in die 2025/26-seisoen na China uit te voer.

Du Preez het gesê dat die volgende stap is om toegang vir kersies te verseker. Suid-Afrika se jaarlikse produksie van perskes en nektariens (hoofsaaklik geelvleis nektariens) is sowat 182 000 ton, terwyl pruimproduksie sowat 93 000 ton is, met ’n uitvoerseisoen wat strek van Oktober tot Maart of April van die volgende jaar. Dit strook met China se winter- en lenteseisoene, wat ‘n perfekte geleentheid bied vir buiteseisoen-aanbod.