Suid-Afrikaanse appels en pere skitter in Indië

Suid-Afrikaanse appels en pere het die Indiese mark  soos die Springbokke se ‘bomb squad’ getref. In so  ‘n mate dat daar kommer oor interne mededinging is.

Suid-Afrikaanse soet peer variëteite het ander pere van regoor die wêreld uitgestof en vervang met hul voortreflike gehalte en konsekwente aanbod. Dit was die boodskap van Shubha Rawal, hoof van verkryging by IG International, by die International Fresh Produce Association (IFPA) Suider-Afrika-konferensie wat onlangs gehou is. Rawal het die ongeëwenaarde sukses van Suid-Afrikaanse vrugte beklemtoon.

Terwyl ander streke sukkel om tred te hou met prysinflasie, het Suid-Afrikaanse pere nie net die uitdagings weerstaan nie, maar ook in die bloeiende Indiese ekonomie gefloreer. Volgens Rawal het post-COVID-gesondheidsbewussyn Indië se eetgewoontes verander, met vars, voedsame produkte soos sitrus, avokado’s en nou pere wat prominensie kry.

Suid-Afrikaanse peeruitvoere na Indië was so suksesvol dat daar nou vrese is dat die verskillende kultivars mekaar in die Indiese mark kan begin kannibaliseer. Hortgro het die afgelope dekade gewerk om Suid-Afrika se uitvoermarkte te diversifiseer en die fokus weg te skuif van tradisionele bestemmings in die Noordelike Halfrond soos Europa en die Verenigde Koninkryk (VK).

In 2006 het Suid-Afrika 108 452 ton pere uitgevoer, waarvan 83% na die Verenigde Koninkryk, die Europese Unie en Rusland gegaan het, en net 13% is na Afrika, die Midde-Ooste, die Verre Ooste en Asië. Teen 2023 het uitvoere tot 224 220 ton gestyg, met slegs 50% wat na tradisionele markte gegaan het en 46% is na ontluikende markte soos Indië.

En dit is nie net pere waarvoor die Indiese mark lus is nie. Volgens Hortgro se bestuurder van markte en handel, Jacques du Preez, het Suid-Afrikaanse appeluitvoere Indië nog meer gegroei.  “Tot op hede, het ons hierdie jaar net so onder drie miljoen  kartonne uitgevoer, wat 54% meer is as verlede jaar.”